Nagbabala ang Pamahalaan ng US sa ‘Pagdami ng Romance Scams’ na Target ang mga Balo o Diborsiyadong Matatanda

Ayon sa U.S. Department of Homeland Security (DHS), ang mga romance scam ay tumatarget kamakailan sa mga matatandang balo at diborsyado dahil sa kanilang kahinaan.

Ininterbyu ng DHS ang isang babaeng taga-Los Angeles na nasa huling bahagi ng kanyang 60s na nabiktima ng romance scam dalawang taon matapos mamatay ang kanyang asawa.

Sumali siya sa isang seniors dating site at napansin ang larawan ng isang tao na nagpapaalala sa kanya ng kanyang yumaong asawa. Inilarawan ng scammer ang sarili bilang isang “Spanish lumberjack” na nawalan din ng asawa, at kalaunan, napaniwala siya nitong magpadala ng malaking halaga ng pera.

Noong 2022, halos 70,000 katao sa US ang nag-ulat na nabiktima sila ng romance scams sa Federal Trade Commission (FTC), na may kabuuang naitalang pagkalugi na umabot sa $1.3 billions.

Inilalahad ng DHS ang iba’t ibang palatandaan ng posibleng romance scammer na dapat bantayan ng mga senior.

“Maaari kang maging target ng romance scammer kung ang taong kausap mo online ay nagpapakita ng alinman sa mga sumusunod na indikasyon:

• Nagsasabing nakatira, nagtatrabaho, o naglalakbay sa ibang bansa.
  • Kulang sa tamang gramatika, kahit sinasabi nilang marunong mag-Ingles.
• Nagsasabing mas bata sila nang malaki kaysa sa iyo.
• Agad na nagpapahayag ng pagmamahal sa iyo.
• May kwento na hindi tugma o pabago-bago.
• May kakaunting online presence.
• Nagpapadala ng mga pangkalahatang larawan (karamihan ay peke o AI generated) ng kanilang paglalakbay, pamimili, o pagkain sa mga marangyang lugar.
  • Nagpapadala o humihingi ng mga sensitibong larawan o video.
• Binabanggit ang ideya ng pagkikita at pagsasama sa lalong madaling panahon.
• Palaging may dahilan kung bakit hindi makapag-video call (hal. FaceTime).
  • Kung may video call man, hindi mo malinaw na makikita ang kanilang mukha.
• Humihiling na ilipat ang usapan o text sa ibang app (hal. WhatsApp, Telegram).
• Humihingi ng pera, kadalasan sa pamamagitan ng hindi tradisyonal na paraan tulad ng cryptocurrency o gift cards.
  • Nagtatanong kung ikaw ay nakapag-invest na sa cryptocurrency at/o foreign exchange market.
  • Nagpapadala ng business link ng isang cryptocurrency at/o foreign exchange trading platform.
• Nagiging palaban o sinusubukang ilihis ang iyong atensyon kapag kinukwestyon mo ang kanilang intensyon.”

Generated Image: Midjourney