AQSH OAVsi oshkor qildi: Isroil Eronga qarshi harakat uchun AQSHdan aniq rozilik olganini ma’lum qildi

AXIOS hisobotiga ko‘ra, Isroilning Eron hududiga uyushtirgan hujumi 1979-yilgi Islom inqilobidan beri Eron rejimiga qaratilgan eng muhim zarba sifatida baholanmoqda. Bu voqea Qo‘shma Shtatlarni ham mojaroga tortib kirishi mumkin va yadroviy kelishuvga erishish umidini butunlay yo‘qqa chiqardi. Garchi Tramp o‘zi Isroilning muzokaralarni “portlatib yuborishi” mumkin bo‘lgan hujumlariga bir necha bor qarshi ekanini bildirgan bo‘lsa-da, hujumdan so‘ng Isroil rasmiylari barcha harakatlar Vashington bilan muvofiqlashtirilganini ma’lum qilishdi. Tramp va uning yordamchilari omma oldida Isroil harakatlariga qarshi chiqqandek ko‘ringan, ammo xususiy suhbatlarda hech qanday e’tiroz bildirmagan. Isroillik rasmiylardan biri: “Biz AQShdan aniq yashil chiroq oldik”, dedi. Ularning aytishicha, maqsad Eronni yaqin orada hujum bo‘lmaydi deb ishontirish va Isroil nishoniga tushgan eronliklar yangi joylarga ko‘chib o‘tmasligini ta’minlash bo‘lgan. Bundan tashqari, Netanyaxuning yordamchilari Tramp dushanba kuni telefon orqali Isroilni hujumdan to‘xtatishga uringandek ko‘ringanini, aslida esa bu qo‘ng‘iroq operatsiyani oldindan muvofiqlashtirishga qaratilganini aytishdi. AQSh tomoni bu da’volarning birontasini ham tasdiqlamagan.